ముఖంపై ఉండే జిడ్డు, మురికి పోవాలంటే..?

Oily Skin Tips

చాలా మందికి బ‌య‌ట ఎక్కువ‌గా తిర‌గ‌డం వ‌ల్ల ముఖంపై జిడ్డు, మురికి ఏర్ప‌డుతుంటాయి. అయితే కొంద‌రికి ఎల్ల‌ప్పుడూ జిడ్డు ముఖ‌మే ఉంటుంది. దీంతో మొటిమ‌లు, మ‌చ్చ‌ల వంటి ఇత‌ర స‌మ‌స్య‌లు కూడా వ‌స్తుంటాయి. ఈ క్ర‌మంలో కింద ఇచ్చిన ప‌లు సింపుల్ టిప్స్‌ను పాటిస్తే ముఖంపై ఏర్ప‌డే జిడ్డు, మురికిల‌ను తొల‌గించుకోవ‌చ్చు. ఆ టిప్స్ ఏమిటో ఇప్పుడు చూద్దాం. 

1. కలబంద గుజ్జులో కొన్ని చుక్కల నిమ్మరసం కలిపి ముఖానికి రాసి ఆరిన తర్వాత గోరువెచ్చని నీటితో శుభ్రం చేసుకోవాలి. దీంతో ముఖంపై ఉన్న జిడ్డు, మురికి పోయి ముఖం కాంతివంతంగా మారుతుంది. 

2. కలబంద ఆకులను నీటిలో వేసి మరిగించాలి. ఈ ఆకులను పేస్ట్ చేసి కొన్ని చుక్కల తేనె కలిపి ముఖానికి రాసి 15 నిమిషాల తర్వాత శుభ్రం చేసుకోవాలి. ఈ విధంగా వారంలో మూడు సార్లు చేస్తే జిడ్డు, మురికి తొలగిపోతాయి. 

3. ఒక పాత్ర‌లో ఒక టీస్పూన్ కలబంద గుజ్జు, అర టీస్పూన్ పెరుగు, అర టీస్పూన్ కీరదోస రసం, కొన్ని చుక్కల రోజ్ వాటర్ వేసి బాగా కలపాలి. ఈ మిశ్రమాన్ని ముఖానికి రాసి ఆరిన తర్వాత చల్లని నీటితో శుభ్రం చేసుకోవాలి. చర్మం మీద మురికి పోవడ‌మే కాకుండా అనేక చర్మ సమస్యలు తగ్గుతాయి. 

4. ఒక పాత్ర‌లో రెండు టీస్పూన్ల కలబంద గుజ్జు, ఒక టీస్పూన్ ఓట్స్, ఒక టీస్పూన్ కీరదోస తురుము వేసి బాగా కలపాలి. ఈ మిశ్రమాన్ని ముఖానికి పట్టించి వలయాకారంలో మసాజ్ చేయాలి. అనంత‌రం కొంత సేపు ఆగాక క‌డిగేయాలి. దీంతో ముఖంపై ఉన్న జిడ్డు, మురికి తొల‌గిపోయి ముఖం కాంతివంతంగా మారుతుంది. 

ఈ లాభాలు తెలిస్తే చింత గింజ‌ల‌ను అస‌లు పారేయ‌రు..!

Tamarind Seeds Powder

చింత‌పండును తీసేట‌ప్పుడు స‌హ‌జంగా ఎవ‌రైనా వాటి నుంచి వ‌చ్చే చింత గింజ‌ల‌ను పారేస్తారు. అయితే ఇది చ‌దివాక చింత గింజ‌ల‌ను ఇంకోసారి అలా పారేయ‌రు. ఎందుకంటే వాటిలో ఎంతో ఉప‌యోగ‌క‌ర‌మైన ఆరోగ్య‌క‌ర ప్ర‌యోజ‌నాలు దాగి ఉన్నాయి. అవేమిటో ఇప్పుడు తెలుసుకుందాం. 

కొన్ని చింత గింజ‌ల‌ను సేక‌రించి వాటిని బాగా వేయించాలి. అనంత‌రం 2 రోజుల పాటు వాటిని నీటిలో నాన‌బెట్టాలి. రోజుకు రెండు సార్లు నీటిని మార్చాలి. 2 రోజుల త‌రువాత చింత గింజ‌ల‌ను తీసి వాటి పొట్టును వేరు చేయాలి. అనంత‌రం వ‌చ్చే విత్త‌నాల‌ను చిన్న చిన్న ముక్క‌లుగా చేసి నీడ‌లో ఎండ‌బెట్టాలి. అలా ఎండిన ముక్క‌ల‌ను తీసుకుని మిక్సీలో వేసి పొడిగా ప‌ట్టాలి. ఆ పొడిని జార్‌లో నిల్వ చేసుకోవాలి. దీన్ని అర టీస్పూన్ మోతాదులో తీసుకుని రోజుకు రెండు సార్లు నీటితో లేదా పాల‌తో నెయ్యి లేదా చ‌క్కెర‌ను క‌లిపి తీసుకోవాలి.

పైన చెప్పిన విధంగా చేయ‌డం వ‌ల్ల మోకాళ్ల నొప్పుల నుంచి వెంట‌నే ఉప‌శ‌మ‌నం ల‌భిస్తుంది. అంతేకాదు 3-4 వారాల్లో స‌మ‌స్య పూర్తిగా తగ్గుముఖం ప‌డుతుంది. ఎందుకంటే చింత గింజ‌ల్లో ఉండే ప‌లు ఔష‌ధ పదార్థాలు ఎముక‌ల‌కు బ‌లాన్నిస్తాయి. అదేవిధంగా కీళ్ల‌లో అరిగిపోయిన గుజ్జును మ‌ళ్లీ ఉత్పత్తి చేస్తాయి. దీంతో కీళ్ల నొప్పుల నుంచి శాశ్వ‌తంగా విముక్తి ల‌భిస్తుంది. 

అయితే పైన చెప్పిన మిశ్ర‌మం కేవ‌లం కీళ్ల నొప్పులే కాదు డ‌యేరియా, చ‌ర్మంపై దుర‌ద‌లు, దంత సంబంధ స‌మ‌స్య‌లు, అజీర్ణం, రోగ నిరోధ‌క శ‌క్తి త‌క్కువ‌గా ఉండ‌డం, ద‌గ్గు, గొంతు ఇన్‌ఫెక్ష‌న్లు, డ‌యాబెటిస్‌, గుండె సంబంధ వ్యాధులకు చ‌క్క‌ని ఔష‌ధంగా కూడా ఉప‌యోగ‌ప‌డుతుంది. అదేవిధంగా ఎముక‌లు విరిగితే ఆ ప్ర‌దేశంపై రోజూ చింత‌గింజ‌ల పొడిని పేస్ట్‌లా చేసి అప్లై చేస్తే దాంతో ఎముక‌లు త్వ‌ర‌గా అతుక్కుంటాయి.

ఈ లాభాలు తెలిస్తే... సీతాఫ‌లాన్ని ఇప్పుడే తింటారు..!

custard-apple

ఈ సీజ‌న్‌లో మ‌న‌కు ల‌భించే అనేక ర‌కాల పండ్ల‌లో సీతాఫ‌లం కూడా ఒక‌టి. అత్యంత తియ్య‌ని రుచిని క‌లిగి ఉండ‌డ‌మే కాదు, ఈ పండ్ల‌ను తిన‌డం వ‌ల్ల మ‌న‌కు ఎన్నో ర‌కాల పోష‌కాలు కూడా ల‌భిస్తాయి. సీజ‌న‌ల్ ఫ్రూట్‌గా మ‌న‌కు ల‌భించే సీతాఫ‌లంలో విట‌మిన్ ఎ, మెగ్నిషియం, పొటాషియం, ఫైబ‌ర్‌, విట‌మిన్ బి6, కాల్షియం, విట‌మిన్ సి, ఐర‌న్ వంటి అత్యంత ముఖ్య‌మైన పోష‌కాలు ఎన్నో ఉన్నాయి. వీటిని ఈ కాలంలో ఎక్కువ‌గా తిన‌డం వ‌ల్ల మ‌న‌కు అనేక ర‌కాల లాభాలు క‌లుగుతాయి. అవేమిటో ఇప్పుడు తెలుసుకుందాం. 

సీతాఫ‌లాన్ని ఉద‌యాన్నే అల్పాహారంగా తీసుకుంటే దాంతో కండ‌రాలు, న‌రాల బ‌ల‌హీన‌త‌లు తొల‌గిపోతాయి. శ‌రీరానికి కావ‌ల్సిన శ‌క్తి ల‌భిస్తుంది. 

విట‌మిన్ ఎ ఎక్కువ‌గా ఉండ‌డం వ‌ల్ల కంటి రోగాలు తొల‌గిపోతాయి. దృష్టి స‌మ‌స్య‌లు దూర‌మ‌వుతాయి. 

సీతాఫ‌లంలో ఉండే మెగ్నిషియం గుండె జ‌బ్బులు రాకుండా చూస్తుంది. వీటిలో ఉండే పోష‌కాలు శ‌రీరంలో పేరుకుపోయిన కొవ్వును క‌రిగిస్తాయి. 

సీతాఫ‌లాన్ని రోజూ తింటుంటే క‌డుపులో ఉండే నులిపురుగు చ‌నిపోతాయి. అల్స‌ర్లు న‌య‌మ‌వుతాయి. గ్యాస్‌, అసిడిటీ, అజీర్ణం, మ‌ల‌బ‌ద్దకం వంటి జీర్ణ సంబంధ స‌మ‌స్య‌లు త‌గ్గుతాయి. 

ర‌క్తం త‌క్కువగా ఉన్న వారు సీతాఫ‌లాల‌ను తిన‌డం మంచిది. దీంతో ర‌క్తం త‌యార‌వుతుంది. 

శ‌రీరంలో బాగా వేడి ఉన్న వారు సీతాఫ‌లాల‌ను తింటే వెంట‌నే వేడి నుంచి ఉప‌శ‌మ‌నం ల‌భిస్తుంది. 

చిన్నారులు, బాలింత త‌ల్లుల‌కు సీతాఫ‌లం చ‌క్క‌ని పోష‌కాల‌ను అందిస్తుంది. వారికి త‌గిన శ‌క్తి ల‌భిస్తుంది. 

ఎదుగుతున్న పిల్లలు నిత్యం సీతాఫ‌లాన్ని తింటుంటే దాంతో కాల్షియం వంటి పోష‌కాలు ఎక్కువ‌గా ల‌భిస్తాయి. దీని వ‌ల్ల ఎముక‌లు దృఢంగా ఉంటాయి. 

శ‌రీరంలో ఉన్న వ్య‌ర్థ ప‌దార్థాల‌ను బ‌య‌టికి పంపించ‌డంలో సీతాఫ‌లం బాగా ఉప‌యోగ‌ప‌డుతుంది. రక్తం శుద్ధి కూడా అవుతుంది.

చిగుళ్ల స‌మ‌స్య‌లు బాధిస్తుంటే..?

Gum Problems

నిత్యం బ్ర‌ష్ చేసుకుంటూ దంతాల‌ను మ‌నం ఏవిధంగానైతే శుభ్రం చేసుకుంటామో, అలాగే చిగుళ్ల‌ను కూడా ఎప్ప‌టిక‌ప్పుడు శుభ్రం చేసుకోవాలి. లేదంటే చిగుళ్ల వాపు, నొప్పి వ‌స్తుంది. దీంతో దంతాల‌తో ఏదైనా తిందామ‌న్నా ఇబ్బందిగానే ఉంటుంది. ఈ క్ర‌మంలో కింద ఇచ్చిన ప‌లు టిప్స్‌ను పాటిస్తే చిగుళ్ల స‌మ‌స్య నుంచి బ‌య‌ట ప‌డ‌వ‌చ్చు. అదెలాగో ఇప్పుడు చూద్దాం. 

1. కొద్దిగా నువ్వుల నూనెను తీసుకుని వేడి చేసి దాన్ని నోట్లో వేసుకుని ఆయిల్ పుల్లింగ్ చేసిన‌ట్టు పుక్కిలించాలి. దీంతో కొద్ది రోజుల్లోనే చిగుళ్ల స‌మ‌స్య నుంచి బ‌య‌ట ప‌డ‌వ‌చ్చు. అంతేకాదు ఇలా చేయ‌డం వ‌ల్ల దంత క్ష‌యం రాకుండా ఉంటుంది.

2. గ్రీన్ టీని నిత్యం తాగుతున్నా దంతాలు, చిగుళ్ల స‌మ‌స్య నుంచి బ‌య‌ట ప‌డ‌వ‌చ్చు. ఇలా తాగడం వ‌ల్ల వాపుకు గురైన చిగుళ్ల స‌మ‌స్య త‌గ్గుతుంది. చెడు బాక్టీరియా పోతుంది. ఇన్‌ఫెక్ష‌న్లు రాకుండా ఉంటాయి.

3. అలోవెరా (క‌లబంద‌)లో యాంటీ ఇన్‌ఫ్లామేట‌రీ, యాంటీ బాక్టీరియ‌ల్ గుణాలు పుష్క‌లంగా ఉన్నాయి. ఇది దంతాలు, చిగుళ్ల స‌మ‌స్య నుంచి ర‌క్షిస్తుంది. నిత్యం కొద్దిగా అలోవెరా జెల్ లేదా జ్యూస్‌ను నోటిలో పోసుకుని పుక్కిలిస్తున్న‌ట్ట‌యితే దంతాలు, చిగుళ్ల స‌మ‌స్య‌ల‌న్నీ తొలగిపోతాయి.

4. నోటిలో పేరుకుపోయిన చెడు బాక్టీరియాను నిర్మూలించ‌డంలో యూక‌లిప్ట‌స్ ఆయిల్ బాగా ఉప‌యోగ‌ప‌డుతుంది. ఇందులో యాంటీ ఇన్‌ఫ్లామేట‌రీ గుణాలు ఉన్నాయి. ఇది చిగుళ్ల స‌మ‌స్య‌ను త‌గ్గిస్తుంది. కొద్దిగా యూక‌లిప్ట‌స్ ఆయిల్‌ను తీసుకుని కొంత నీటిలో వేసి బాగా క‌ల‌పాలి. అనంత‌రం ఈ మిశ్ర‌మాన్ని బాగా పుక్కిలించాలి. రోజూ ఇలా చేస్తే త్వ‌ర‌లోనే దంతాలు, చిగుళ్ల స‌మ‌స్య‌లు పోతాయి.

బ‌రువు త‌గ్గించే కీరదోస జ్యూస్‌...

Cucumber Juice

చాలా త‌క్కువ మొత్తంలో క్యాల‌రీల‌ను క‌లిగి ఉండే వాటిలో కీర‌దోస కాయ కూడా ఒక‌టి. దీంట్లో పొటాషియం, విటమిన్ ఎ, సి, మెగ్నిష‌యం వంటి పోష‌కాలు పుష్క‌లంగా ఉంటాయి. దీన్ని మ‌నం త‌ర‌చూ ప‌లు ఆహార ప‌దార్థాల‌తోపాటుగా తీసుకుంటూనే ఉంటున్నాం. అయితే కీర‌దోస‌తో త‌యారు చేసే ఓ జ్యూస్‌ను నిత్యం తీసుకోవ‌డం వ‌ల్ల శ‌రీరంలో అధికంగా ఉన్న కొవ్వు క‌రిగిపోతుంది. దీంతో బ‌రువు త‌గ్గ‌వ‌చ్చు. ఆ జ్యూస్‌ను ఎలా త‌యారు చేయాలో ఇప్పుడు చూద్దాం. 

1 లేదా 2 కీర‌దోస‌కాయ‌ల‌ను, 1 నిమ్మ‌కాయ‌ను, 10 పుదీనా ఆకుల‌ను, 1 లీట‌ర్ నీటిని తీసుకోవాలి. కీర‌దోస‌కాయ‌ల‌ను, పుదీనా ఆకుల‌ను, కొద్దిగా నీటిని క‌లిపి మెత్త‌ని పేస్ట్‌లా చేయాలి. అనంత‌రం ఈ పేస్ట్‌ను 1 లీట‌ర్ నీటిలో మిక్స్ చేయాలి. దానికి కొంత నిమ్మ‌ర‌సం క‌ల‌పాలి. అంతే... కీర‌దోస జ్యూస్ త‌యారైన‌ట్టే. దీన్ని రోజూ 2, 3 సార్లు తాగుతుంటే ఫ‌లితం ఉంటుంది. దీంతో త్వ‌ర‌గా బ‌రువు త‌గ్గ‌వ‌చ్చు. అయితే ఈ మిశ్ర‌మం బ‌రువు త‌గ్గించేందుకే కాదు, జీర్ణ‌క్రియ‌ను పెంపొందించ‌డంలోనూ ఉప‌యోగ‌ప‌డుతుంది. పొట్ట‌లో ఏర్ప‌డే అల్స‌ర్లు కూడా త‌గ్గిపోతాయి. శ‌రీరంలోని విష ప‌దార్థాలు తొల‌గింప‌బ‌డ‌తాయి.

నిద్ర‌కు ముందు గ్రీన్ టీ తాగితే..?

గ్రీన్ టీ... ఇప్పుడు చాలా మంది దీన్ని తమ నిత్యం జీవితంలో భాగం చేసుకుంటున్నారు. కార‌ణం, అది అందించే ఆరోగ్య‌క‌ర ప్ర‌యోజ‌నాలే. సాధార‌ణ టీలు తాగేవారు కూడా దానికి బ‌దులుగా గ్రీన్ టీని తాగుతున్నారు. అయితే రోజులో ఎప్పుడైనా చాలా మంది గ్రీన్ టీ తాగుతారు. కానీ రాత్రి పూట నిద్రించ‌డానికి క‌నీసం గంట ముందు గ్రీన్ టీ తాగితే దాంతో కొన్ని ర‌కాల అనారోగ్య స‌మ‌స్య‌ల‌ను ఎఫెక్టివ్‌గా దూరం చేసుకోవ‌చ్చు. అవేమిటో ఇప్పుడు తెలుసుకుందాం. 

1. రాత్రి పూట నిద్రించ‌డానికి గంట ముందు గ్రీన్ టీని తాగితే శ‌రీర మెటబాలిజం బాగా పెరుగుతుంది. దీంతో నిద్ర పోతున్నా కూడా శ‌రీరంలో ఉన్న కొవ్వు వేగంగా క‌రిగిపోతుంది. దీని వ‌ల్ల బ‌రువు త‌గ్గుతారు. 

2. రాత్రి నిద్ర‌కు ముందు గ్రీన్ టీని తాగ‌డం వ‌ల్ల ఫ్లూ, జ‌లుబు, ద‌గ్గు వంటి శ్వాస కోశ స‌మ‌స్య‌లు చాలా వ‌ర‌కు దూరం అవుతాయ‌ని ఇటీవ‌ల చేసిన ప‌రిశోధ‌న‌ల్లో వెల్ల‌డైంది. 

3. నిద్రించ‌డానికి ముందు గ్రీన్ టీని తాగ‌డం వ‌ల్ల శ‌రీరం రిలాక్స్ అవుతుంది. మ‌న‌సంతా ప్ర‌శాంతంగా మారి చ‌క్క‌గా నిద్ర ప‌డుతుంది. అంతేకాదు, మ‌రుస‌టి రోజు లేచే స‌రికి ఉల్లాసం, ఉత్తేజం క‌లుగుతాయి. 

4. రోజంతా మ‌నం తిన్న ప‌లు ఆహార ప‌దార్థాల కార‌ణంగా శ‌రీరంలో వ్య‌ర్థాలు పేరుకుపోతాయి. వాట‌న్నింటినీ క్లీన్ చేయాలంటే రాత్రి పూట నిద్ర‌కు ముందు గ్రీన్ టీని తాగాలి. 

5. కాటెచిన్ అని పిల‌వ‌బ‌డే యాంటీ ఆక్సిడెంట్లు గ్రీన్ టీలో పుష్క‌లంగా ఉంటాయి. అయితే రాత్రి పూట నిద్ర‌కు ముందు గ్రీన్ టీని తాగ‌డం వ‌ల్ల ఈ యాంటీ ఆక్సిడెంట్లు త‌మ ప‌ని ప్రారంభిస్తాయి. దీంతో శ‌రీరంలో అంత‌ర్గ‌తంగా ఉన్న అనారోగ్య స‌మ‌స్య‌లు దూర‌మ‌వుతాయి. అంతేకాదు రోగ నిరోధ‌క వ్య‌వ‌స్థ బ‌ల‌ప‌డుతుంది. 

అయితే గ్రీన్ టీలో పాలు, చ‌క్కెర వంటివి క‌ల‌ప‌కుండా డైరెక్ట్‌గా తాగాలి. అలా తాగితేనే పైన చెప్పిన విధంగా అద్భుత‌మైన ఫ‌లితాల‌ను పొంద‌వ‌చ్చు.

గ్యాస్‌, అసిడిటీల నుంచి వెంట‌నే ఉప‌శ‌మ‌నం కావాలంటే..?

Acidity Problem

స‌రైన స‌మ‌యానికి ఆహారం తీసుకోక‌పోవ‌డం, స్థూల‌కాయం, తిండి ఎక్కువ‌గా తిన‌డం, ఒత్తిడి... ఇలా కార‌ణాలు ఏమున్నా నేడు చాలా మంది క‌డుపులో గ్యాస్ స‌మ‌స్య‌తో బాధ‌ప‌డుతున్నారు. ఈ క్ర‌మంలో ఏవేవో మందుల‌ను వాడుతున్నారు. వాటితో అప్ప‌టిక‌ప్పుడు స‌మ‌స్య త‌గ్గినా దాంతో ఇత‌ర సైడ్ ఎఫెక్ట్స్ కూడా వ‌స్తున్నాయి. అయితే అలాంటి సైడ్ ఎఫెక్ట్స్ రాకుండా ఉండాలంటే కింద ఇచ్చిన కొన్ని స‌హ‌జ సిద్ధ‌మైన చిట్కాల‌ను పాటించి చూడండి. దీంతో గ్యాస్ స‌మ‌స్య కూడా త‌గ్గిపోతుంది. 

1. చ‌క్కెర క‌ల‌ప‌కుండా బాగా చ‌ల్ల‌గా ఉన్న పాల‌ను ఒక గ్లాస్ మోతాదులో తాగాలి. దీంతో క‌డుపులో చ‌ల్ల‌బ‌డుతుంది. గ్యాస్‌, అసిడిటీ, మంట త‌గ్గిపోతాయి. పాల‌లో ఎక్కువ‌గా ఉండే కాల్షియం క‌డుపులో ఉన్న ఆమ్లాల‌ను పీల్చుకుని గ్యాస్ స‌మ‌స్య నుంచి ఉప‌శ‌మ‌నం క‌లిగిస్తుంది. 

2. రెండు, మూడు యాల‌కుల‌ను తీసుకుని బాగా న‌లిపి పొడి చేయాలి. ఈ పొడిని ఒక గ్లాస్ నీటిలో మ‌రిగించాలి. అనంత‌రం వ‌చ్చే మిశ్ర‌మాన్ని వ‌డ‌క‌ట్టి చ‌ల్లార్చి తాగాలి. దీంతో గ్యాస్ స‌మ‌స్య పోతుంది. 

3. ఒక టీస్పూన్ తేనెను తాగాలి. దీంతో కేవ‌లం 5 నిమిషాల్లోనే అసిడిటీ స‌మ‌స్య నుంచి ఉప‌శ‌మ‌నం ల‌భిస్తుంది. క‌డుపులోని మ్యూక‌స్ పొర‌ను ర‌క్షించే ఔష‌ధంగా తేనె ప‌నిచేస్తుంది. 

4. అసిడిటీ, గ్యాస్ స‌మ‌స్య‌ల నుంచి వెంట‌నే ఉప‌శ‌మ‌నం ల‌భించాలంటే ఒక గ్లాస్ కొబ్బ‌రి నీటిని తాగాలి. దీంతో ఆ స‌మ‌స్య‌లు తొల‌గిపోతాయి.

ప‌ర‌గ‌డుపునే వేడి నీళ్లు తాగితే..?

నీరు మ‌న శ‌రీరానికి ఎంత అవ‌స‌ర‌మో అంద‌రికీ తెలిసిందే. నీటిని రోజూ త‌గినంత మోతాదులో తాగ‌డం వ‌ల్ల మ‌న‌కు అనేక ర‌కాల ఆరోగ్య‌క‌ర ప్ర‌యోజ‌నాలు కూడా క‌లుగుతాయి. అయితే నీటిని సాధార‌ణ రూపంలో కాక వేడిగా ఉన్న‌ప్పుడు తాగితే ఇంకా మంచి ఫ‌లితాలు ఉంటాయి. అదే ఆ వేడి నీటిని ప‌ర‌గ‌డుపున తాగితే దాంతో మ‌న‌కు క‌లిగే అనేక అనారోగ్యాల‌ను దూరం చేసుకోవచ్చు. అవేమిటో ఇప్పుడు తెలుసుకుందాం. 

1. ప‌ర‌గ‌డుపున వేడి నీటిని తాగితే శ‌రీరంలో ర‌క్త ప్ర‌స‌ర‌ణ మెరుగు ప‌డుతుంది. శ‌రీరంలో ఉన్న మ‌లినాలు, చెడు ప‌దార్థాలు, వ్య‌ర్థాలు బ‌య‌టికి వెళ్లిపోతాయి. 

2. జీర్ణ‌క్రియ మెరుగుప‌డుతుంది. జీర్ణ సంబంధ స‌మ‌స్య‌లు తొల‌గిపోతాయి. మ‌ల‌బ‌ద్ద‌కం దూర‌మ‌వుతుంది. పైల్స్ ఉన్న‌వారికి వేడి నీరు ఎంత‌గానో ఉపయోగ‌ప‌డుతుంది. 

3. ఉద‌యాన్నే రెండు గ్లాసుల వేడి నీటిని తాగితే త్వ‌ర‌గా బ‌రువు త‌గ్గుతారు. కొవ్వు వేగంగా క‌రిగిపోతుంది. 

4. శ‌రీర ఉష్ణోగ్ర‌త నియంత్ర‌ణ‌లో ఉంటుంది. జ్వ‌రం వంటి అనారోగ్యాలు రావు. ఇత‌ర అవ‌య‌వాల‌న్నీ ఆరోగ్యంగా ఉంటాయి. ప్ర‌ధానంగా కిడ్నీల‌కు చాలా మంచిది. 

5. ఉద‌యాన్నే బ్రేక్‌ఫాస్ట్ చేయ‌డానికి అర‌గంట ముందు ఒక గ్లాస్ వేడి నీటిని తాగితే క‌డుపు నొప్పి త‌గ్గుతుంది. శ‌రీర మెట‌బాలిజం వేగవంత‌మ‌వుతుంది. ఇది క్యాల‌రీల‌ను ఖ‌ర్చు చేసేందుకు ఉపయోగ‌ప‌డుతుంది. 

6. ద‌గ్గు, జ‌లుబు, గొంతు నొప్పి వంటి శ్వాస కోశ స‌మ‌స్య‌లు దూర‌మ‌వుతాయి. శ్వాస ప్ర‌క్రియ మెరుగు ప‌డుతుంది.

బ‌రువు త‌గ్గించే రాగి అంబ‌లితో ఎన్నో లాభాలు..!

To Decrease Weight

ధాన్య‌పు గింజ‌లైన రాగుల్లో ఎన్నో ర‌కాల పోష‌క ప‌దార్థాలు ఉంటాయి. అవి మ‌న శరీరానికి ఎంతో మేలు చేస్తాయి. అయితే రాగుల‌తో త‌యారు చేసే అంబ‌లిని తాగ‌డం వ‌ల్ల మ‌న‌కు ఎంతో ప్ర‌యోజ‌నం క‌లుగుతుంది. ప్ర‌ధానంగా బ‌రువు త‌గ్గుతారు. ఇంకా చాలా లాభాలే ఉన్నాయి. ఈ క్ర‌మంలో రాగి అంబ‌లిని ఎలా తయారు చేయాలో, దాంతో మ‌న‌కు ఎలాంటి ఉపయోగాలు ఉన్నాయో ఇప్పుడు తెలుసుకుందాం. 

రాగుల‌ను కొంత ప‌రిమాణంలో తీసుకుని వాటిని కొన్ని గంట‌ల పాటు నీటిలో నాన‌బెట్టాలి. అనంత‌రం వాటిని శుభ్ర‌మైన వ‌స్త్రంలో క‌ట్టి మ‌ళ్లీ కొన్ని గంట‌ల పాటు ఉంచితే అవి మొల‌కెత్తుతాయి. కొన్ని సార్లు రాగులు మొల‌కెత్త‌డం ఆల‌స్యం కూడా అవ‌చ్చు. అయినా కొంత సేపు నిరీక్షించి మొల‌కెత్తిన రాగుల‌ను సేక‌రించాలి. వాటిని బాగా ఎండబెట్టి దంచి పొడి చేయాలి. ఆ పొడిని కొంత నీటిలో వేసి బాగా ఉడికించాలి. దీంతో జావ త‌యారవుతుంది. ఇందులో అవ‌సరం అయితే జీడిపప్పు, ప‌ల్లీలు, కిస్మిస్‌, తేనె వంటివి క‌లుపుకోవ‌చ్చు. లేదంటే ఉప్పు, కారం కూడా క‌ల‌ప‌వ‌చ్చు. అలా క‌లుపగా వ‌చ్చేదే రాగి అంబ‌లి. దీన్ని నిత్యం తాగితే మ‌న శరీరానికి ఎంతో మేలు జ‌రుగుతుంది. 

1. రాగి అంబలి శరీరానికి మంచి బలాన్ని ఇస్తుంది. రోజంతా శరీరానికి కావ‌ల్సిన శ‌క్తి, పోష‌కాలు రాగి అంబ‌లి ద్వారా అందుతాయి. దీంతో ఎక్కువ సేపు ప‌నిచేయ‌వ‌చ్చు. రోజంతా ఉత్సాహంగా ఉంటుంది. 

2. ఎదిగే పిల్లలకు దీనిని ఇవ్వడం వల్ల శక్తివంతంగా తయారవుతారు. చ‌దువుల్లో బాగా ప్ర‌తిభ‌ను క‌న‌బ‌రుస్తారు. మెద‌డు చురుగ్గా ఉంటుంది. 

3. రాగి అంబ‌లికి చ‌లువ చేసే గుణం ఉంది. దీంతో శరీరంలో ఉండే అధిక వేడిని త‌గ్గించుకోవ‌చ్చు. 

4. ఒక గ్లాస్ రాగి అంబ‌లి తాగినా చాలా సేపు ఆక‌లి వేయ‌దు. దీంతో క‌డుపు నిండిన భావ‌న కలుగుతుంది. ఆహారం ఎక్కువ‌గా తినాల‌నిపించ‌దు. ఇది బ‌రువు త‌గ్గాల‌నుకునే వారికి మేలు చేస్తుంది. స్థూల‌కాయం ఉన్న వారు రాగి అంబలి తాగితే వేగంగా బ‌రువు త‌గ్గ‌వ‌చ్చు. 

5. ప్ర‌తి రోజూ ఉద‌యం చేసే సాధార‌ణ అల్పాహారానికి బ‌దులుగా రాగి అంబ‌లి తాగితే దాంతో మ‌నం రోజంతా యాక్టివ్‌గా ఉండ‌వ‌చ్చు. శారీర‌క దృఢ‌త్వం చేకూరుతుంది. 

6. బీపీ, షుగ‌ర్ నియంత్ర‌ణ‌లోకి వ‌స్తాయి. ర‌క్త‌స్రావం జ‌రుగుతున్న వారికి రాగి అంబ‌లి తాగిస్తే స్రావం ఆగిపోతుంది. 

7. రాగి అంబ‌లిని నిత్యం తాగుతుంటే పురుషుల్లో వీర్యం వృద్ధి చెందుతుంది.

గొంతు నొప్పి త‌గ్గాలంటే..?

సీజ‌న్ మారిందంటే చాలు. చాలా మందికి జ‌లుబు, ద‌గ్గు వ‌స్తుంటాయి. దీంతోపాటు అనేక మందిని గొంతు నొప్పి కూడా బాధిస్తుంది. అయితే కింద ఇచ్చిన ప‌లు టిప్స్ పాటిస్తే గొంతు నొప్పిని సుల‌భంగా త‌గ్గించుకోవ‌చ్చు. ఆ టిప్స్ ఏమిటో ఇప్పుడు తెలుసుకుందాం. 

1. ఒక టేబుల్ స్పూన్ గ‌ళ్ళ ఉప్పు లేదా వంట సోడాను గ్లాస్ గోరువెచ్చని నీటిలో వేసి క‌లియ‌బెట్టాలి. ఆ నీటిని పుక్కిలించాలి. ఇలా రోజుకు నాలుగైదు సార్లు చేస్తే ఉప్పు యాంటిసెప్టిక్‌గా పనిచేసి గొంతును శుభ్రం చేసి నొప్పినుంచి ఉపశమనం కలిగిస్తుంది. బీపి ఉన్నవాళ్లు ఈ పని చేయరాదు.

2. వేడి నీటిలో కాస్త తేనె వేసి తీసుకుంటే గొంతునొప్పి నుంచి త్వర‌గా ఉపశమనం పొందవచ్చు.

3. ఒక గ్లాసు నీటిలో నిమ్మరసం కలిపి రోజూ తీసుకుంటే గొంతు సమస్యలు తొలగిపోతాయి.

4. దాల్చిన చెక్క పొడి, తేనె కలిపిన మిశ్రమాన్ని తింటే దగ్గు, జలుబుతో కూడిన గొంతు నొప్పి నుంచి రిలీఫ్ లభిస్తుంది.

5. మిరియాల పొడిని కాస్త తేనెలో కలిపి తినటం లేదా పాలల్లో మిరియాలపొడి కలిపి తాగినా గొంతు సమస్యలు తగ్గుతాయి.

6. గొంతులో మంటగా ఉంటే వెల్లుల్లి రెబ్బను తింటే గొంతులో మంట తగ్గుతుంది.

7. గొంతులో గరగర వంటి సమస్యలు పోవాలంటే ఉల్లిపాయ రసం సేవించడం లేదా అల్లంతో చేసిన టీని గాని అల్లాన్ని నీటిలో ఉడికించి ఆ నీటిని గాని సేవిస్తే గొంతు సమస్యలకు చెక్ పెట్టవచ్చు.

సైనస్ సమస్య బాధిస్తుంటే..?

సైనస్... వాతావ‌ర‌ణం మారిన‌ప్పుడ‌ల్లా చాలా మందిని ఇబ్బంది పెడుతుంది. ప్ర‌ధానంగా చ‌లికాలంలో, చ‌లిగా ఉన్న వాతావ‌ర‌ణంలో సైన‌స్ ఇంకా ముప్పు తిప్ప‌లు పెడుతుంది. త‌ల‌నొప్పి ఎక్కువ‌గా ఉండ‌డం, క‌ళ్ల ద‌గ్గ‌ర దుర‌ద‌గా ఉండ‌డం, ముక్కుకు ఇరువైపులా ప‌ట్టుకుంటే నొప్పి… ఇవ‌న్నీ సైన‌స్ ల‌క్ష‌ణాలు. అయితే కింద ఇచ్చిన కొన్ని టిప్స్‌ను పాటిస్తే సైన‌స్ స‌మ‌స్య నుంచి ఉప‌శ‌మ‌నం పొంద‌వ‌చ్చు. అవేమిటంటే... 

1. నిత్యం మ‌నం తినే ఆహారంలో కారం పొడిని ఎక్కువ‌గా వాడాలి. దీని వ‌ల్ల ముక్కు నుంచి ఎక్కువ‌గా నీరు రాకుండా ఉంటుంది. సైన‌స్ నుంచి ఉప‌శ‌మ‌నం ల‌భిస్తుంది. 

2. సైనస్ స‌మ‌స్య‌ను త‌గ్గించ‌డంలో వెల్లుల్లి కూడా బాగానే ఉప‌యోగ‌ప‌డుతుంది. దీంట్లో యాంటీ బాక్టీరియల్‌, యాంటీ ఫంగ‌ల్ గుణాలు ఉన్నాయి. రోజుకు 2, 3 వెల్లుల్లి రేకుల్ని తింటున్నా సైన‌స్ స‌మ‌స్య నుంచి బ‌య‌ట ప‌డ‌వ‌చ్చు. 

3. ఒక టీస్పూన్ వాము తీసుకుని నూనె లేకుండా పెనం మీద కొద్దిగా వేయించాలి. దాన్ని బాగా న‌లిపి ఒక శుభ్ర‌మైన వ‌స్త్రంలో పెట్టి బాగా వాస‌న పీల్చాలి. దీంతో ముక్కు లోపలి రంధ్రాలు బాగా తెరుచుకుంటాయి. ఈ క్ర‌మంలో త‌ల‌నొప్పి త‌గ్గిపోతుంది. సైన‌స్ నుంచి ఉప‌శ‌మ‌నం ల‌భిస్తుంది. 

4. ప్రాణాయామం వంటి శ్వాస‌క్రియ వ్యాయామాల‌ను చేసిన‌ట్టియ‌తే సైన‌స్ నుంచి ఉప‌శ‌మ‌నం ల‌భిస్తుంది. 

5. ఒక టీస్పూన్ జీల‌క‌ర్ర‌ను బాగా వేయించి పొడి చేయాలి. దాంట్లో రెండు టీస్పూన్ల తేనె క‌లిపి రోజుకు 2 సార్లు తీసుకుంటే సైన‌స్ నుంచి ఉప‌శ‌మ‌నం ల‌భిస్తుంది. 

6. క్యారెట్ జ్యూస్ 300 ఎంఎల్‌, పాల‌కూర ర‌సం 200 ఎంఎల్ మోతాదులో తీసుకుని రోజుకు ఒక సారి తాగాలి. దీని వ‌ల్ల సైన‌స్ నుంచి బ‌య‌ట ప‌డ‌వ‌చ్చు. 

7. ఒక పాత్ర‌లో నీటిని తీసుకుని బాగా మరిగించాలి. దాంట్లో కొన్ని చుక్క‌ల యాపిల్ సైడ‌ర్ వెనిగ‌ర్ వేసి ఆ నీటి నుంచి వ‌చ్చే ఆవిరిని పీల్చాలి. దీంతో ముక్కులోని రంధ్రాలు తెరుచుకుని గాలి బాగా ఆడుతుంది. స‌మ‌స్య నుంచి ఉప‌శ‌మ‌నం ల‌భిస్తుంది. 

8. విట‌మిస్ సి ఎక్కువ‌గా ఉండే నిమ్మ‌, ఉసిరి, కివీ పండ్లను త‌ర‌చూ తీసుకుంటుంటే సైన‌స్ నుంచి విముక్తి పొంద‌వచ్చు. 

9. ట‌మాటా ర‌సంతో చేసిన టీ తాగుతున్నా సైన‌స్ త‌గ్గిపోతుంది.

అనారోగ్య స‌మ‌స్య‌ల‌ను మ‌టుమాయం చేసే నువ్వుల నూనె...

ఇప్పుడంటే అన్నీ రిఫైన్డ్ నూనెలు వచ్చాయి కానీ ఒక‌ప్పుడు మ‌న వాళ్లు గానుగ‌ల్లో ఆడించిన నూనెల‌నే ఎక్కువ‌గా వాడేవారు. అలాంటి నూనెల్లో నువ్వుల నూనె కూడా ఒక‌టి. తెల్ల‌నివి, న‌ల్ల‌నివి అని రెండు ర‌కాలుగా ఈ నువ్వులు ఉంటాయి. వీటి నుంచి తీసే నూనెలో ఎన్నో ర‌కాల పోష‌క ప‌దార్థాలు ఉంటాయి. మ‌న శ‌రీరానికి అవ‌స‌ర‌మైన విట‌మిన్ ఇ, కాల్షియం, జింక్‌, ఐర‌న్‌, థ‌యామిన్, ఒమెగా 6 ఫ్యాటీ యాసిడ్లు, ప్రోటీన్లు, యాంటీ ఆక్సిడెంట్లు నువ్వుల నూనెలో మ‌న‌కు పుష్క‌లంగా ల‌భిస్తాయి. ఈ క్ర‌మంలో నువ్వుల నూనెను నిత్యం మ‌న ఆహారంలో భాగం చేసుకుంటే క‌లిగే ప్ర‌యోజ‌నాలు ఏమిటో ఇప్పుడు తెలుసుకుందాం. 

1. నువ్వుల నూనెలో విట‌మిన్ ఇ, బిలు పుష్క‌లంగా ఉన్నాయి. ఇవి చ‌ర్మాన్ని సంర‌క్షించ‌డ‌మే కాదు, అన్ని ర‌కాల చ‌ర్మ స‌మ‌స్య‌ల‌ను దూరం చేస్తాయి. నువ్వుల నూనెను త‌ర‌చూ వాడ‌డం వ‌ల్ల ముఖం కాంతివంత‌మ‌వుతుంది. చ‌ర్మం మృదువుగా మారుతుంది. 

2. నిత్యం స్నానం చేసే ముందు చిన్న పిల్ల‌ల‌కు నువ్వుల నూనెతో మ‌ర్ద‌నా చేస్తే వారి శ‌రీరం బాగా ఎదుగుతుంది. మెద‌డు ప‌దునుగా మారుతుంది. చిన్నారుల్లో ఉండే కొవ్వు క‌రిగిపోతుంది. ఈ నూనెలో ఉండే పోష‌కాల‌న్నీ పిల్ల‌ల‌కు ల‌భిస్తాయి. అయితే పెద్ద‌లు కూడా స్నానానికి ముందు నువ్వుల నూనెతో మ‌ర్ద‌నా చేసుకోవ‌చ్చు. 

3. నువ్వుల నూనెలో ఒమెగా-3,6 ఫ్యాటీ యాసిడ్లు ఎక్కువగా ఉంటాయి. ఇవి బీపీని త‌గ్గిస్తాయి. శ‌రీరంలో పేరుకుపోయిన కొలెస్ట్రాల్ నిల్వ‌ల‌ను త‌గ్గిస్తాయి. 

4. కాప‌ర్‌, ఇత‌ర ప‌వ‌ర్‌ఫుల్ యాంటీ ఆక్సిడెంట్లు నువ్వుల నూనెలో ఉంటాయి. దీంతో ఇవి కీళ్ల నొప్పుల‌ను త‌గ్గిస్తాయి. కొద్దిగా నువ్వుల నూనెను తీసుకుని కొంచెం వేడి చేసి మోకాళ్ల‌పై రాసుకుంటే నొప్పులు, వాపులు త‌గ్గిపోతాయి. 

5. పైన చెప్పిన విధంగా నువ్వుల నూనెను శ‌రీరంపై కొవ్వు ఉన్న ప్రాంతాల్లో రాస్తే అధికంగా ఉన్న కొవ్వు క‌రిగిపోతుంది. 

6. నువ్వుల నూనెలో ఉండే పోష‌కాలు ఎముక‌ల‌కు దృఢ‌త్వాన్ని ఇస్తాయి. ర‌క్త‌నాళాల‌ను శుభ్రం చేస్తాయి. శ్వాస‌కోశ స‌మ‌స్య‌ల‌ను దూరం చేస్తాయి. 

7. మ‌ధుమేహ వ్యాధి గ్ర‌స్తులు నిత్యం 2 టేబుల్ స్పూన్ల మోతాదులో నువ్వుల నూనెను ఏవిధంగానైనా తీసుకుంటే వారి శ‌రీరంలోని ర‌క్తంలో ఉండే చ‌క్కెర స్థాయిలు త‌గ్గుముఖం ప‌డ‌తాయి. దీని వ‌ల్ల షుగ‌ర్ నియంత్ర‌ణ‌లో ఉంటుంది. 

8. నువ్వుల నూనెతో త‌ల‌కు మ‌ర్ద‌నా చేస్తే జుట్టు బాగా పెరుగుతుంది. వెంట్రుక‌లు రాల‌డం త‌గ్గుతుంది. చుండ్రు స‌మ‌స్య పోతుంది.

ఉద‌యాన్నే వెల్లుల్లి, తేనె మిశ్ర‌మం తీసుకుంటే..?

వెల్లుల్లిని నిత్యం మ‌నం వంట‌ల్లో ఎక్కువ‌గా ఉప‌యోగిస్తుంటాం. అదేవిధంగా తేనెను కూడా ప‌లు ర‌కాల స‌లాడ్స్‌లో, టీ, కాఫీ, పాలు వంటి డ్రింక్స్‌లో కొంద‌రు తీసుకుంటారు. అయితే ఈ రెండింటిలోనూ మ‌న శ‌రీరానికి కావ‌ల్సిన ఎన్నో ర‌కాల పోష‌కాలు సమృద్ధిగా ఉన్నాయి, కాబ‌ట్టి ఈ రెండింటినీ క‌లిపి ఉద‌యాన్నే ప‌ర‌గ‌డుపున తీసుకుంటే దాంతో మ‌న‌కు ఎన్నో ర‌కాల ఆరోగ్య‌క‌ర ప్ర‌యోజ‌నాలు క‌లుగుతాయి. అవేమిటో ఇప్పుడు తెలుసుకుందాం. 

కొన్ని వెల్లుల్లి రేకుల్ని తీసుకుని బాగా న‌లిపి 15 నిమిషాల పాటు అలాగే ఉంచాలి. దీంతో వాటిలో ఉండే పోష‌కాలు రెట్టింపు అవుతాయి. అనంత‌రం ఆ మిశ్ర‌మాన్ని తేనెతో క‌లిపి ఉద‌యాన్నే ప‌ర‌గ‌డుపున తీసుకోవాలి. ఇలా చేస్తే ఏయే లాభాలు క‌లుగుతాయంటే... 

1. వెల్లుల్లి, తేనెల‌ను క‌లిపి మిశ్ర‌మంగా చేసి ఉద‌యాన్నే ప‌ర‌గడుపున తీసుకుంటే శ‌రీరంలో వ్యాధి నిరోధ‌క శ్య‌క్తి పెరుగుతుంది. ఎలాంటి ఇన్‌ఫెక్ష‌న్ల‌నైనా త‌ట్టుకునే శ‌క్తి వ‌స్తుంది. దీంతోపాటు ఈ రెండింటిలో ఉండే ప‌వ‌ర్‌ఫుల్ యాంటీ ఆక్సిడెంట్లు శ‌రీరంలోని ఫ్రీ ర్యాడిక‌ల్స్ ప్ర‌భావాన్ని త‌గ్గిస్తాయి. దీంతో చ‌ర్మంపై ముడ‌త‌లు త‌గ్గుతాయి. 

2. వెల్లుల్లి, తేనె మిశ్రమం రక్త సరఫరాను మెరుగు పరుస్తుంది. రక్త నాళాల్లో రక్తం గడ్డ కట్టకుండా చూస్తుంది. ఆయా ప్రాంతాల్లో పేరుకుపోయే కొవ్వును కూడా తొలగిస్తుంది. దీంతో వివిధ రకాల గుండె జబ్బులు రాకుండా చూసుకోవచ్చు.

3. యాంటీ ఇన్‌ఫ్లామేటరీ గుణాలు కూడా వెల్లుల్లి, తేనె మిశ్రమంలో ఉన్నాయి. దీంతో ఇది శరీరంలో ఏర్పడే నొప్పులు, వాపులను తగ్గిస్తుంది. గొంతు నొప్పి, మంట వంటివి తగ్గిపోతాయి.

4. జీర్ణాశయ సంబంధ సమస్యలు దూరమవుతాయి. డయేరియా, అజీర్ణం, గ్యాస్, అసిడిటీ వంటి సమస్యలను నయం చేసుకోవచ్చు. పెద్ద పేగులో ఏర్పడే ఇన్‌ఫెక్షన్లకు అడ్డుకట్ట వేయవచ్చు.

5. జలుబు, ఫ్లూ జ్వరం, సైనస్ వంటి అనారోగ్యాలను నయం చేసుకోవచ్చు. ఫంగస్ ఇన్‌ఫెక్షన్లు తగ్గిపోతాయి.

6. శరీరంలోని విష పదార్థాలను, క్రిములను బయటకి పంపే శక్తి ఈ మిశ్రమానికి ఉంది. ఆర్యోగానికి పూర్తి సంరక్షణను ఇస్తుంది.

7. దెబ్బలు, కాలిన గాయాలు, పుండ్లు వంటివి వెంటనే తగ్గిపోతాయి. శ్వాస కోశ సమస్యలతో బాధ పడుతున్న వారికి ఉపశమనం లభిస్తుంది.

8. శరీరంలోని అవయవాల పనితీరు మెరుగు పడుతుంది. సంపూర్ణ ఆరోగ్యం కలుగుతుంది.

ఈ లాభాలు తెలిస్తే శ‌న‌గ‌ల‌ను అస్స‌లు వ‌ద‌ల‌రు..!

పొట్టు తీసిన శ‌న‌గ‌పప్పును మ‌నం అనేక వంట‌కాల్లో వాడుతుంటాం. కానీ పొట్టు తీయ‌కుండానే ల‌భించే శ‌న‌గ‌ల‌ను లేదా లావుగా ఉండే మ‌రో ర‌క‌మైన కాబూలీ శ‌న‌గ‌ల‌ను తింటే మ‌న‌కు ఎన్నో ర‌కాల ఆరోగ్య‌క‌ర‌మైన ప్ర‌యోజ‌నాలు క‌లుగుతాయి. ముఖ్యంగా ఈ శ‌న‌గ‌ల‌ను నాన‌బెట్టి లేదా ఉడ‌క‌బెట్టి లేదంటే మొల‌కల రూపంలో నిత్యం తీసుకుంటే దాంతో ఎన్నో లాభాలు క‌లుగుతాయి. ప‌లు అనారోగ్య స‌మ‌స్య‌లు కూడా దూర‌మ‌వుతాయి. ఈ క్ర‌మంలో శ‌న‌గ‌ల వ‌ల్ల మ‌న‌కు ఎలాంటి ఉప‌యోగాలు ఉంటాయో ఇప్పుడు తెలుసుకుందాం. 

1. శ‌న‌గ‌ల్లో పీచు ప‌దార్థం ఎక్కువ‌గా ఉంటుంది. ఇది శ‌రీరంలో ఉన్న కొలెస్ట్రాల్‌ను త‌గ్గించి వేస్తుంది. దీంతో గుండె సంబంధ స‌మ‌స్య‌లు రాకుండా చూసుకోవ‌చ్చు.

2. నాన్‌వెజ్ తిన‌లేని వారికి శ‌న‌గ‌ల‌ను ఒక వ‌ర‌మ‌ని చెప్ప‌వ‌చ్చు. ఎందుకంటే మాంసంలో ఉండే ప్రోటీన్ల‌న్నీ శ‌న‌గ‌ల‌లో లభిస్తాయి.

3. పొటాషియం, మెగ్నిషియం, కాల్షియం వంటి ఎన్నో ర‌కాల మిన‌ర‌ల్స్ శ‌న‌గల్లో ఉంటాయి. ఇవి బీపీని కంట్రోల్ చేస్తాయి. ఎక్కువ సేపు ఉన్నా ఆక‌లి వేయ‌కుండా చేస్తాయి. దీంతో బ‌రువు త‌గ్గాల‌నుకునే వారికి శ‌న‌గ‌లు బాగా ఉప‌యోగ‌ప‌డ‌తాయ‌ని చెప్ప‌వ‌చ్చు.

4. శ‌న‌గ‌ల‌ను త‌ర‌చూ తింటుంటే ర‌క్తంలో ఎర్ర ర‌క్త క‌ణాల సంఖ్య పెరుగుతుంది. దీంతో ర‌క్తం బాగా ప‌డుతుంది. ఇది ర‌క్త‌హీన‌త ఉన్న వారికి ఎంత‌గానో మేలు చేస్తుంది.

5. శ‌న‌గ‌ల్లో అమైనో యాసిడ్లు, ట్రిప్టోఫాన్‌, సెరొటోనిన్ వంటి ఉప‌యోగ‌క‌ర‌మైన పోష‌కాలు స‌మృద్ధిగా ఉంటాయి. ఇవి చ‌క్క‌గా నిద్ర ప‌ట్టేలా చేస్తాయి. దీంతో నిద్ర‌లేమి దూర‌మ‌వుతుంది. అంతేకాదు ఒత్తిడి, ఆందోళ‌న వంటివి కూడా త‌గ్గిపోతాయి.

6. శ‌న‌గ‌ల్లో ఆల్ఫా లినోలినిక్ యాసిడ్‌, ఒమెగా 3 ఫ్యాటీ యాసిడ్లు స‌మృద్ధిగా ఉంటాయి. ఇవి కొలెస్ట్రాల్‌ను త‌గ్గించ‌డంతోపాటు గుండె ఆరోగ్యాన్ని మెరుగు ప‌రుస్తాయి.

7. ఐర‌న్‌, ప్రోటీన్లు, మిన‌ర‌ల్స్‌స‌మృద్ధిగా ఉండ‌డం వ‌ల్ల శ‌న‌గ‌లు శరీరానికి మంచి శ‌క్తిని ఇస్తాయి. యాంటీ ఆక్సిడెంట్లు బాగా ఉండ‌డం వ‌ల్ల రోగ నిరోధక వ్య‌వ‌స్థ ప‌టిష్ట‌మ‌వుతుంది.

8. పాల‌లో ఉండే కాల్షియంకు దాదాపు స‌మానమైన కాల్షియం శ‌న‌గ‌ల్లో ల‌భిస్తుంది. దీంతో ఎముక‌లు దృఢంగా మారుతాయి. ఎముక‌లకు పుష్టి క‌లుగుతుంది.

9. పాస్ఫ‌ర‌స్ ఎక్కువ‌గా ఉండ‌డం వ‌ల్ల శ‌రీరంలో ఎక్కువ‌గా ఉన్న ఉప్పును బ‌య‌టికి పంపుతుంది. కిడ్నీల ప‌నితనం మెరుగు ప‌డుతుంది. ప‌చ్చ కామెర్లు ఉన్న వారు శ‌న‌గ‌ల‌ను తింటే త్వ‌ర‌గా కోలుకుంటారు.

10. మాంగ‌నీస్‌, పాస్ఫ‌ర‌స్ స‌మృద్ధిగా ఉండ‌డం వ‌ల్ల చ‌ర్మ సంబంధ స‌మ‌స్య‌లు తొల‌గిపోతాయి. దుర‌ద‌, గ‌జ్జి వంటి వాటి నుంచి ఉప‌శ‌మ‌నం ల‌భిస్తుంది.

డెంగీతో... జ‌ర జాగ్ర‌త్త‌..!

డెంగీ... ఇప్పుడు మ‌న ద‌గ్గ‌ర ఎక్క‌డ చూసినా దీని బారిన ప‌డి చాలా మంది హాస్పిట‌ల్స్‌కు ప‌రుగులు పెడుతున్నారు. కొంద‌రు జ్వ‌రం రాగానే రక్త ప‌రీక్ష‌లు చేయించుకుని డెంగీ అని తేలితే వెంట‌నే చికిత్స తీసుకుంటున్నారు. కాగా ఇంకొంద‌రిలో మాత్రం వ్యాధి వ‌చ్చిన 5, 6 రోజుల వ‌ర‌కు గానీ జ్వ‌రం, ఇత‌ర ల‌క్ష‌ణాలు క‌నిపించ‌డం లేదు. ఈ క్ర‌మంలో అలాంటి వారిలో కొంద‌రు ప్లేట్‌లెట్ల‌ను బాగా కోల్పోతుండ‌డంతో వారు ప్రాణాపాయ స్థితికి చేరుకుంటున్నారు. కొన్ని చోట్ల డెంగీతో మృతి చెందిన‌వారి వార్త‌ల‌ను కూడా వింటున్నాం. క‌నుక ఏ చిన్న అనారోగ్య సూచ‌న, ల‌క్ష‌ణం క‌నిపించినా అశ్ర‌ద్ధ చేయ‌కుండా వెంట‌నే త‌గిన జాగ్ర‌త్త తీసుకుని వైద్యుని వ‌ద్ద‌కు వెళ్ల‌డం ఉత్త‌మం. ఈ క్ర‌మంలో అస‌లు డెంగీ ఎలా వ‌స్తుంది, దాని దోమ‌లు ఎలా ఉంటాయి, అవి ఎక్క‌డ‌, ఎలా పెరుగుతాయి, డెంగీ వ‌చ్చాక క‌నిపించే ల‌క్ష‌ణాలు, ఆ వ్యాధి ప‌ట్ల మ‌నం తీసుకోవాల్సిన జాగ్ర‌త్త‌ల‌ను గురించి ఇప్పుడు మ‌నం వివ‌రంగా తెలుసుకుందాం. 

నాలుగు ర‌కాల వైర‌స్‌ల‌తో డెంగీ వ్యాప్తి...
డీఈఎన్‌వీ 1,2,3,4 అనే నాలుగు ర‌కాల వైర‌స్‌ల వ‌ల్ల డెంగీ వ్యాప్తి చెందుతుంది. ఈ వైర‌స్ ఉన్న వ్య‌క్తిని AEDES అనే పేరున్న దోమ కుడితే అప్పుడు ఆ వైర‌స్ స‌ద‌రు దోమ‌లోకి ప్ర‌వేశిస్తుంది. కానీ వారం రోజుల వ‌ర‌కు ఆ దోమ‌లో వైర‌స్ ప్ర‌భావం ఉండ‌దు. అనంత‌రం వైర‌స్ వృద్ధి చెందుతుంది. అప్పుడు ఆ వైర‌స్‌తో ఇన్‌ఫెక్ట్ అయిన‌ దోమ‌లు మ‌ళ్లీ ఎవ‌రినైనా కుడితే వారికి డెంగీ వ‌స్తుంది. 

నీరు ఎక్కువ‌గా నిల్వ ఉన్న చోటే...
ఈ AEDES దోమ‌లు నీరు ఎక్కువ‌గా ఉన్న‌చోటే గుడ్ల‌ను పెట్టి త‌మ సంతానాన్ని వృద్ధి చెందిస్తాయి. వీటిలో కేవ‌లం ఆడ‌దోమ‌లు మాత్ర‌మే మ‌న‌ల్ని కుడ‌తాయి. ఎందుకంటే వాటికి గుడ్లు త‌యారు అయ్యేందుకు త‌గిన ప్రోటీన్ అవ‌స‌రం. అందుకు అవి మ‌నిషి ర‌క్తం మీద ఆధార ప‌డ‌తాయి. అందుకే మ‌నల్ని అవి కుడ‌తాయి. అలా మ‌న‌ల్ని కుట్టి పీల్చిన ర‌క్తంతో AEDES ఆడ‌దోమ‌లు గుడ్ల‌ను ఉత్ప‌న్నం చేసి నీరు ఎక్కువ‌గా నిల్వ ఉన్న చోట వాటిని పెడ‌తాయి. ఆ నీటిలో ఉన్న గుడ్లు 8 రోజుల త‌రువాత పిల్ల‌లుగా మారుతాయి. అయితే AEDES దోమ‌ల గుడ్లు ఎంత‌టి ఉష్ణోగ్ర‌త‌ల‌నైనా త‌ట్టుకుని కొన్ని నెల‌ల పాటు అలాగే ఉంటాయి. మ‌ళ్లీ నీరు వాటి వ‌ద్ద‌కు రాగానే అప్పుడ‌వి పిల్ల‌లుగా మారుతాయి. అందుకే వ‌ర్షాకాలంలో ఎక్కువ‌గా ఇవి ఉత్ప‌న్నం అవుతాయి. ఆ స‌మ‌యంలోనే రోగాల‌ను వ్యాప్తి చెందిస్తాయి. 

సైలెంట్‌గా వ‌చ్చి కుట్టే టైగ‌ర్ దోమ‌లు...
AEDES జాతికి చెందిన ఆడ‌దోమ‌లు సైలెంట్‌గా వ‌చ్చి కుడ‌తాయి. వీటిని టైగ‌ర్ దోమ‌ల‌ని కూడా పిలుస్తారు. ఈ దోమ‌ల జీవితం కాలం దాదాపుగా 2 వారాలు. ఆ స‌మ‌యంలోనే ఒక్కో దోమ 3 సార్లు 100 గుడ్ల చొప్పున పెడుతుంది. అలా పెట్ట‌బ‌డిన గుడ్లు పిల్ల‌లుగా మారుతాయి. వాటిలోనూ డెంగీ వైర‌స్ ఉంటుంది. ఆ వైర‌స్ వాటిలో వాటి జీవిత కాలం వ‌ర‌కు అలాగే ఉంటుంది. ఈ క్ర‌మంలో ఆ దోమ‌లు కూడా గుడ్లు పెట్టి మ‌ళ్లీ పిల్ల‌ల్ని ఉత్ప‌త్తి చేస్తే వాటిలోనూ డెంగీ ఉంటుంది. అలా ఆ వైర‌స్ వాటిలో ఎప్ప‌టికీ నిరంత‌రాయంగా తిరుగుతూనే ఉంటుంది. 

డెంగీ దోమ‌లు ప‌గ‌లే ఎక్కువ‌గా కుడ‌తాయి...
తెల్ల‌వారు జామున సూర్యోద‌యం జ‌రిగేట‌ప్పుడు, సాయంత్రం సూర్యుడు అస్త‌మించేట‌ప్పుడు దాదాపు 2 గంట‌ల స‌మ‌యం పాటు ఈ దోమలు ఎక్కువ‌గా దాడి చేస్తాయి. ప‌గ‌టి పూట కూడా ఇవి కుడ‌తాయి. అన్ని దోమ‌ల్లా కాకుండా డెంగీ దోమ‌లు మ‌న శ‌రీరం కింది భాగంలో ఎక్కువ‌గా కుడ‌తాయి. ఈ దోమ‌లు తాము ఉన్న ప్ర‌దేశాల నుంచి సుమారు 400 మీట‌ర్ల దూరం వ‌ర‌కు మాత్ర‌మే వెళ్తాయి. అందుకే ఆ ప‌రిధిలో నీరు నిల్వ ఉండే ప్రాంతాలను త‌ర‌చూ శుభ్రం చేసుకోవాలి. ఈ దోమ‌లు చీక‌టి ఎక్కువ‌గా ఉన్న ప్రాంతాల్లో నివాసం ఉంటాయి. దుస్తుల‌ను త‌గిలించే హ్యాంగ‌ర్ల వెనుక‌, క‌ప్‌బోర్డులు, మంచాల కింద‌, క‌ర్టెన్ల ద‌గ్గ‌ర ఈ దోమ‌లు ఉండేందుకు అవ‌కాశం ఉంది. కేవ‌లం ఒక‌టి రెండు డెంగీ దోమ‌లు ప‌రిస‌రాల్లో ఉన్నా పెద్ద ఎత్తున డెంగీ విష జ్వ‌రాల‌ను ప్ర‌బ‌లించేందుకు ఆస్కారం ఉంటుంది. 

శ‌రీరం, కాళ్ల‌పై గీత‌ల‌తో...
AEDES జాతికి చెందిన దోమ‌లకు శ‌రీరం, కాళ్ల‌పై తెల్ల‌ని గీత‌లు ఉంటాయి. అయితే ఇదే జాతిలో AEDES AEGYPTI అనే మ‌రో దోమ కూడా ఉంది. ఇది కూడా చూసేందుకు AEDES దోమ‌లాగే ఉంటుంది. కానీ ఈ దోమ కుడితే మాత్రం డెంగీ, చికున్‌గున్యా రెండూ ఒకేసారి వ‌స్తాయి. అధిక శాతం మందిలో డెంగీ దోమ కుట్టిన త‌రువాత 5 నుంచి 6 రోజుల‌కు దాని ల‌క్ష‌ణాలు క‌నిపించి జ్వ‌రం వ‌స్తుంది. కానీ కొంద‌రిలో మాత్రం డెంగీ ల‌క్ష‌ణాలేవీ క‌న‌బ‌డ‌వు. అయినా వారు యాక్టివ్‌గానే ఉంటారు. అయితే వారిలోనూ ఒక్కోసారి కొన్నికొన్ని అనారోగ్య ల‌క్ష‌ణాలు క‌నిపిస్తాయి. క‌నుక వాటిని జాగ్ర‌త్త‌గా ప‌రిశీలించ‌డం అవ‌స‌రం. 

డెంగీ ల‌క్ష‌ణాలు...
తీవ్ర‌మైన త‌ల‌నొప్పి, కంటి వెనుక భాగాల్లో నొప్పులు, కండ‌రాల నొప్పులు, కీళ్ల నొప్పులు, చ‌ర్మంపై దుర‌ద‌లు, ముక్కు లేదా చిగుళ్ల నుంచి ర‌క్తం కార‌డం, తీవ్ర‌మైన జ్వ‌రం, వాంతులు, క‌డుపులో నొప్పి, వికారంగా ఉండ‌డం వంటి ల‌క్ష‌ణాలు డెంగీలో క‌నిపిస్తాయి. అయితే ఇవే ల‌క్ష‌ణాలు అంద‌రిలో ఉండ‌క‌పోవ‌చ్చు కూడా. కొన్ని ల‌క్ష‌ణాలు లేకుండా కూడా డెంగీ ఉంటుంది. వీటిలో ఏ ల‌క్ష‌ణం కనిపించినా వెంట‌నే త‌గిన జాగ్ర‌త్త తీసుకోవ‌డం ఆవ‌శ్య‌కం. 

ప్లేట్‌లెట్లు కీల‌కం...
డెంగీ వ‌చ్చిన రోగుల్లో వైద్యులు రోజూ ప్లేట్‌లెట్ల సంఖ్య‌ను ప‌రిశీలిస్తారు. సాధార‌ణంగా జ్వ‌రంతోపాటు ఇత‌ర ల‌క్ష‌ణాలు కూడా ఉంటే ప్లేట్‌లెట్ల సంఖ్య రోజూ త‌గ్గిపోతూనే ఉంటుంది. అదే అనారోగ్య లక్ష‌ణాలు క్ర‌మంగా త‌గ్గుతుంటే ప్లేట్‌లెట్ల సంఖ్య పెరుగుతుంది. ఈ క్రమంలో చాలా మంది డెంగీ పేషెంట్ల‌లో రోజుకు 10వేల నుంచి 30వేల వ‌ర‌కు ప్లేట్‌లెట్లు త‌గ్గుతుంటాయి. ఆరోగ్య‌వంత‌మైన వ్య‌క్తులకు ఒక మైక్రో లీట‌ర్ ర‌క్తానికి గాను 1.50 ల‌క్ష‌ల నుంచి 4.50 ల‌క్ష‌ల వ‌ర‌కు ప్లేట్‌లెట్లు ఉండాలి. స‌హ‌జంగా ఇవి అంద‌రిలోనూ 2.50 ల‌క్ష‌ల వ‌ర‌కు ఉంటాయి. కానీ డెంగీ వ‌చ్చాక రోజుకు 30వేల వ‌ర‌కు త‌గ్గే అవ‌కాశం ఉంటుంది. రోగ నిరోధ‌క శక్తి బాగా త‌క్కువ‌గా ఉన్న వారిలో, చిన్నారుల్లో, వృధ్దుల్లో ప్లేట్‌లెట్లు ఇంకా వేగంగా ప‌డిపోయేందుకు ఆస్కారం ఉంటుంది. అయితే ప్లేట్‌లెట్ కౌంట్ 20వేల వ‌ర‌కు వ‌చ్చే వ‌ర‌కు వారికి బ‌య‌టి నుంచి ప్లేట్‌లెట్ల‌ను ఎక్కించాల్సిన అవ‌స‌రం లేదు. అంత‌కు త‌గ్గితేనే ప్లేట్‌లెట్ల‌ను ఎక్కించాల్సి ఉంటుంది. అయితే కొంద‌రిలో ప్లేట్‌లెట్ల 20వేల వ‌ర‌కు రాకున్నా వారికి ఉన్న అనారోగ్య ల‌క్ష‌ణాల తీవ్ర‌త‌ను బ‌ట్టి ప్లేట్‌లెట్ల‌ను ఎక్కించాల్సి వ‌స్తుంది. 

తీసుకోవాల్సిన జాగ్ర‌త్తలు...

డెంగీ రాకుండా ఉండేందుకు గాను మనం కొన్ని జాగ్ర‌త్త‌ల‌ను త‌ప్ప‌నిస‌రిగా పాటించాలి. అవేంటంటే... 

1. శ‌రీరాన్ని పూర్తిగా క‌ప్పే దుస్తుల‌ను ధ‌రించాలి. దీని వ‌ల్ల దోమ‌ల నుంచి ర‌క్ష‌ణ ల‌భిస్తుంది. డెంగీ దోమ‌లు ఎక్కువ‌గా శ‌రీరం కింది భాగంలో కుట్టేందుకు అవ‌కాశం ఉంటుంది కాబ‌ట్టి, ఆ భాగానికి ఇంకా ఎక్కువగా ర‌క్ష‌ణ క‌ల్పించాలి. 

2. డెంగీ దోమ‌లు ప‌గ‌టి పూట ఎక్కువ‌గా కుట్టేందుకు అవ‌కాశం ఉంటుంది క‌నుక‌, ప‌గ‌లు కూడా మ‌స్కిటో రీపెల్లెంట్‌లు, దోమ‌ల కాయిల్స్‌, దోమ తెర‌లు వంటి వాటిని వాడాలి. 

3. ప్ర‌ధానంగా చిన్నారులు, వృద్ధులు డెంగీ ప‌ట్ల ఎంతో అప్ర‌మ‌త్తంగా ఉండ‌డం అవ‌స‌రం. 

4. కిటికీలు, వెంటిలేట‌ర్లు తదిరాల‌కు మ‌స్కిటో నెట్స్‌ను ఏర్పాటు చేసుకోవాలి. 

డెంగీ వ‌చ్చిన‌వారు ఈ సూచ‌న‌లు పాటిస్తే త్వ‌ర‌గా కోలుకునేందుకు అవ‌కాశం ఉంటుంది. 

1. డెంగీ నుంచి పూర్తిగా కోలుకునేంత వ‌ర‌కు రోగుల‌కు పూర్తి బెడ్ రెస్ట్ అవ‌స‌రం. 

2. త‌డిగుడ్డ పెట్టి ఒళ్లంతా తుడ‌వ‌డం, నుదుటిపై పెట్ట‌డం వంటి ప‌నులు చేస్తే జ్వ‌ర తీవ్ర‌త త‌గ్గుతుంది. 

3. ఆస్పిరిన్‌, బ్రూఫిన్ వంటి మాత్ర‌ల‌ను వాడ‌కూడ‌దు. ఇవి గ్యాస్‌, క‌డుపులో నొప్పి, వాంతులు వంటి అనారోగ్యాల‌ను కలిగిస్తాయి. ప్లేట్‌లెట్ల సంఖ్య‌ను కూడా త‌గ్గిస్తాయి. 

4. పారాసిట‌మాల్ సిరప్ గానీ, మాత్ర‌లు ఇవ్వ‌డం వ‌ల్ల జ్వరాన్ని అదుపులోకి తీసుకురావ‌చ్చు. చిన్న పిల్లలకైతే ప్రతి ఆరు గంటల కోసారి ఇవ్వాలి.

5. ఓఆర్ఎస్ లేదా సెలైన్ల ద్వారా ఎల‌క్ట్రోలైట్ల‌ను శ‌రీరంలోకి ఎక్కించాల్సి ఉంటుంది. 

6. వీలైనంత వ‌ర‌కు ద్ర‌వాహారం ఎక్కువగా తీసుకోవాలి. ఆకుప‌చ్చ‌ని కూర‌గాయ‌లు, పండ్లు ఎక్కువ‌గా తినాలి. కొబ్బరి నీళ్లు, బత్తాయి రసం వంటి వాటిని ఎంత ఎక్కవగా ఇస్తే అంత మంచింది. త్వరగా జీర్ణమయి శరీరానికి సత్తువనిస్తాయి. 

7. దానిమ్మ‌, కివీ, బొప్పాయి, యాపిల్ వంటి పండ్ల‌ను ఎక్కువ‌గా తినాలి. ఇవి శ‌రీర రోగ నిరోధ‌క వ్య‌వ‌స్థ‌ను ప‌టిష్టం చేస్తాయి. ప్లేట్‌లెట్ల సంఖ్య‌ను పెంచుతాయి. 

8. డెంగీ నుంచి కోలుకున్నాక క‌నీసం నెల రోజుల వ‌ర‌కు శాఖాహారం తీసుకోవ‌డం ఉత్త‌మం. లేదంటే జ్వ‌రం మ‌ళ్లీ తిర‌గ‌బెట్టేందుకు అవ‌కాశం ఉంటుంది. 

సాధార‌ణంగా డెంగీ ల‌క్ష‌ణాలు క‌నిపించ‌డం ప్రారంభం అయినాక దాని తీవ్ర‌త 7 రోజుల వ‌ర‌కు ఉంటుంది. కొద్ది మందిలో ఇంకా ఎక్కువ రోజులే ఉండ‌వ‌చ్చు. అయితే ఆ స‌మ‌యంలో స్పందించి త‌గు చికిత్స తీసుకుని, జాగ్ర‌త్త‌లు పాటిస్తే డెంగీ నుంచి త్వ‌ర‌గా కోలుకునేందుకు అవ‌కాశం ఉంటుంది. ఈ క్ర‌మంలో 3 నుంచి 5 రోజుల క‌న్నా ఎక్కువ‌గా జ్వరంతో బాధ‌ప‌డుతూ ఉండి, హాస్పిట‌ల్‌కు వెళ్ల‌క‌పోతే ప్లేట్‌లెట్లు గ‌ణ‌నీయంగా త‌గ్గిపోయి ప్రాణాపాయ స్థితికి చేరుకునేందుకు అవ‌కాశం ఉంటుంది. క‌నుక జ్వ‌రం అనిపించ‌గానే వైద్య చికిత్స తీసుకోవ‌డం మంచిది. దీని ప‌ట్ల నిర్ల‌క్ష్యం అస్స‌లు వ‌హించ‌కూడ‌దు.